BOEKWERF

AKSIEVOL EN AKTUEEL

2010-01-29T04:44:00.000-08:00

CHRIS MOOLMAN is 'n skrywer wie se boeke meestal oor aktuele sake handel. Verhale propvol aksie en spanning. Sy eerste roman vir Hartbees Uitgewers, is dan ook een van die eerste boeke om plaasmoorde onder die loep te neem. Onder die titel: Boereplaas, Moordgrond bied Moolman 'n vinnigbewegende roman propvol aksie en spanning.
Hier is 'n skrywer wat die kuns verstaan om van meet af die leser se verbeelding vas te gryp en enduit te hou.En hy span sy doek wyd oor Suid-Afrika tot in die hartjie van Ierland se platteland waar die Ierse Republikeinse Leër in die angsvolle gebeure in Suid-Afrika betrek word.

Kén sy onderwerp

As oud-joernalis en redakteur, is Moolman vertroud met die gegewe waaroor hy skryf. Hy was nie net 'n top-verslaggewer nie, maar ook Londense verteenwoordiger van Nasionale Koerante se dagblaaie en later hoofredakteur van Rapport.
In sy daaropvolgende boek: Mol, weef hy 'n spannende spioenasie verhaal om Willem Mostert, wat uit die bloute 'n uitnodiging van die Amerikanse kulturele aataché na 'n skemerpartytjie ontvang. Dit word die begin van 'n vreesaanjaende avontuur wat sy hele lewe ingrypend verander.
Mostert word midde in 'n politieke magspel geplaas. 'n Spel sonder reëls en waar daar 'n sluipmoord op die Staatspresident beplan word. In hierdie spel is niemand te vertrou nie en weet Mostert dat sy dubbelrol enige oomblik onthul kan word. Spioenasie op sy heel beste!

Gelaaide spanning

In die grootdruk-roman: Neutron, beplan 'n tiran buite ons landsgrense om die Uniegebou met 'n neutronbom op te blaas. Nie alleen sal hy op dié wyse ontslae raak van die Staatspresident nie, maar in 'n omtrek van kilometers sal duisende onskuldige mense sterf.
Hoe kan die aanslag verhoed word terwyl die bom klaar versteek en die minute geluidloos afgetik word?
In 'n skemergrot ver verwyder van die hoofstad, waak 'n donkervrou saam met die albino-siener. Staar hulle in die yl vlamme voor hulle ...wag hulle.
In Pretoria is Willem Malan en ander naarstiglik gewikkel in 'n stryd om tyd.
Oor die grens wag die tiran vir die tyding wat hy weet móét kom ...Spanning wat jou vasgevang hou tot aan die verrassende slot.

Van politiek tot Bybel

Maar hierdie skrywer is 'n man vol verrassings. Onlangs het daar ook 'n Bybelroman uit sy pen by Hartbees verskyn nl: Ester.
Met hierdie roman belig Chris Moolman nie net die bekende verhaal van Ester van die Ou Testament nie, maar hy slaag daarin om op vernuftige en boeiende wyse die milieu, die kleurvolle karakters en die intriges van daardie aangrypende tyd in die Israeliete se geskiedenis, vir die leser nuut en opwindend te beeld.
Van 'n nederige begin styg hierdie uitsonderlike vrou tot die koningin van Xerxes1, die magtigste vors van sy tyd. Op meesleurende wyse word feit en verdigsel 'n bekorende verhaal wat die sluier lig oor 'n merkwaardige gebeurtenis.
Al dié boeke is teen R95 elk, te koop by:Hartbees Uitgewers Posbus 329 Swellendam 6740; Tel:(028)514-1468;Faks:028- 514 1989 of E-pos:gazette@sagateway.com. Die prys sluit posgeld en verpakking in.
Tot volgende keer
BOEKEMAN

SPEUR-INTRIGE TYDENS DIE BOSOORLOG

2010-01-22T00:47:00.000-08:00

Wat Wikus Venter se Bosoorlogroman: Falco, besonders maak, is die feit
dat dit eintlik 'n speurverhaal is wat tydens en teen die agtergrond van die Bosoorlog afspeel.
Daar word 'n moord gepleeg in 'n kontaksituasie met die vyand en dit is hierdie moordenaar wat tot elke prys aan die man gebring moet word. Venter plaas die leser midde in oorlogsituasies: Wam!
Die eerste artilleriebomme ontplof op die teiken. Weens die sand, klink die ontploffing ver en diep. Die aanval het begin! Die bestoking duur 'n paar minute. Hy kyk om hom rond. Betower deur die realiteit van sowat sesduisend ton pantserstaal, honderdduisend rondes ammunisie van alle kleure en geure en ... Shit! enkele meter bokant sy kop klief 'n eskader F1 Mirages deur die lug.Die Mirages vlieg op boomhoogte ... Iewers voor hulle word dood, verminking en verwoesting gesaai...

Leserskommentaar

Venster laat die spanning hooglaai in hierdie pakkende roman. Lees wat skryf lesers wat die boek reeds ter hand gehad het, in graffiti boeke se webwerf daaroor: Walter Muller: Jy word saamgevoer in 'n stryd wat jou soms net so in 'n harwar het as die karakters, om aan die einde 'n uitstekende slot te vind wat jou in verbasing laat uitroep. LEES DIT!
Pieter Lambrechts: Ek kon die boek nie neersit nie. Die skrywer het 'n uitstekende storie geskep van gebeure in die Bosoorlog. Jy móét dit lees.
Jopie Koen: 'n Wonderlike boek wat deurentyd boei. Almal wat op die grens was, behoort hiermee te kan identifiseer. Hoop daar kom spoedig nog sulke verhale uit die skrywer se pen.

Bosvegter

Ja, Wikus is reeds besig aan 'n spannende opvolg boek. Hier is 'n skrywer wat beslis die kuns verstaan om lesers betrokke te kry. En wanneer dit by die Bosoorlog kom, is Venter 'n man wat self daar sy merk gemaak het.
Wikus Venter is 'n Johannesburger van geboorte en het op Bronkhorstspruit gematrikuleer. Daarna sluit hy by die Staandemag aan. Gedurende dié tydperk, behaal hy die graad BA in Krygkunde aan die Militêre Akademie op Saldanha en later die graad BA Honneurs in Geskiedenis aan UNISA. Hy doen diens as Infanterie-offisier by eenhede in die Republiek en in die operasionele gebied (destyds Suidwes-Afrika) en neem deel aan verskeie transgrens operasies in Zambië en Angola.
Hy verlaat die Weermag in 1992 en is tans sakeman en boer in die Bronkhorstspruit omgewing. Hy is getroud en het twee dogters.
* Falco gaan nog 'n ondernemende filmer lok en wie weet ...
Dit is 'n oorspronklike uitgawe van Hartbees Uitgewers teen 'n baie billike R95. Dit sluit posgeld en verpakking in. Posbus 329 SWELLENDAM 6740; FAKS: 028 514 1989 of E-pos:gazette@sagateway.com
Tot volgende keer
BOEKEMAN

MISDAADVEGTER

2010-01-14T06:13:00.000-08:00

TOE Chris Sasner sy eerste Swart Kat-verhaal vir die jeug-
tydskrif PATRYS, geskryf het, het hy aanvaar dat ná publikasie, die sakie afgehandel is. Maar hy het nie rekening met die jong lesers en hul ouers gehou nie.
Daar het talle briewe gevolg wat vir nog Swart Kat-stories gevra het. Daar was ouers wat vertel het dat dit gesinsargumente veroorsaak het wanneer die tydskrif afgelewer is en daar 'n Swart Kat-verhaal in was oor wie dit eerste mag lees!

Swart Kat word reeks

Dit het meegebring dat Sasner 'n reeks verhale vir die tydskrif geskryf het. Die redakteur het selfs sover gegaan om in 'n uitgawe aan te kondig dat daar in die volgende uitgawe 'n Swart Kat-storie gaan wees en darná eers vir Chris geskakel het en hom daarvan vertel het. Sasner het nooit sy lesers teleur gestel nie!
Later het daar nie minder nie as vyf boeke verskyn waarin van die beste stories gebundel is. En kort hierna het Brigadier Films die verhale in 'n baie gewilde TV-reeks verwerk. Die SAUK het nie minder nie as vier reekse van dertien episodes elk, gebeeldsaai. Dit was 'n reeks wat oor taal- en kleurgrense gewild was.

Ander media

Brigadiers het ook gesorg vir 'n langspeelplaat en kasset waarop die gewilde karaktertjie se avonture in hoorbeelde gehoor kon word. Tans bied die SAUK twee DVD's aan met van die beste episodes daarop. Navrae in dié verband kan gerig word aan: Die SAUK Handelsafdeling Tel: (011) 714-5293.
Waarom was dié stories so gewild? Die antwoord is moontlik omdat die hoofkarakter die superheld wat in ons almal skuil, versinnebeeld. Borrie Veldt, met sy ryke verbeelding en avontuurlus, weerspieël dalk so 'n ietsie van elkeen se geheime hunkering. Wanneer hy saans sy swart masker oor sy kop trek en swart mondering aantrek, word hy die ongenaakbare misdaadvegter – die superheld wat op onkonvensionele wyse telkens daarin slaag om sy speurderpa en dié se kollega Kobus Bril, se sake net 'n raps voor hulle op te los. Maar nooit ontvang die Swart Kat erkenning vir sy dade nie. Telkens is daar sy versugting: volgende keer ...

Die Kat kom terug ...

Die boeke is lank reeeds uitdruk, maar die Swart Kat is beslis nie vergete nie. En onlangs het Hartbees Uitgewers weer die eerste boek in die reeks, herdruk nl: Die swart Kat slaan Neer! met Lerentia Basson se treffende omslag soos hierbo afgebeeld. Daar is kostelike swart en wit sketse wat verdere bekoring aan die werkie verleen. Jong lesers word nou weer die geleentheid gebied om met hierdie onstuitbare held kennis te maak. Hier is die held der helde. Die woord genade bestaan nie in sy woordeskat nie. Hy is vinniger as die pik van 'n mamba, geruisloser as 'n arend, so sterk soos 'n bees en so onverskrokke soos 'n ratel!
Om 'n eksemplaar te bekom, skakel met Hartbees Uitgewers : Posbus 329, SWELLENDAM 6740, Tel: (028) 514-1468; FAKS: 028 514-1989; E-pos: gazette@sagateway.com Die prys is: R69.95.

Tot volgende keer

BOEKEMAN

Bekendstelling

2010-01-09T22:48:00.000-08:00

Een van die eerste skrywers wat ek op Boekwerf wil bekend stel, is my ou vriend Basil Stols. Basil was veral bekend vir sy tydskrifvervolg-en kortverhale wat dikwels ook onder sy skuilname: Leoni van Graan, Helene Groskopff en Naomi Weideman, verskyn het.
Basil het nagenoeg twintig boeke geskryf en was mede-draaiboekskrywer vir vyf rolprente waarvan Hoor my lied met wyle Gé Korsten, die bekendste is.
Hy was 'n produktiewe skrywer wat nagenoeg 1500 kortverhale, vervolgverhale,novelles en fotoverhale geskryf het. Hy is al deur 'n kollega as die Afrikaanse Evan Hunter, bestempel. Maar Basil was 'n skrywer in eie reg wat sy oorspronklike stempel op sy werk gelaat het.

Vele talente

Nadat hy sy skoolloopbaan in Gauteng voltooi het, is hy na Stellenbosch Universiteit toe. Na vier jaar as student in teologie, word hy tydskrifjoernalis. En dis hier waar hy sy merk gemaak het. Hy was een van weinige Afrikaanse skrywers wat 'n goeie bestaan uit sy vryskutskryfwerk kon doen. Hy was o.a. ook 'n ervare vlieënier.
Basil is op 13 April 1981 op 54-jarige ouderdom oorlede.
Sy temas was altyd interessant en het wyd getref. Of hy nou 'n aangrypende liefdesverhaal vertel het of 'n polsende speur-spanningsverhaal, Basil Stols het die kuns verstaan om sy lesers se aandag vas te vang en enduit te hou.

Trefferboeke

Ek wil graag twee van sy boeke hier bekendstel wat onlangs by Hartbees Uitgewers in Swellendam, verskyn het. Die eerste titel word hier bo afgebeeld: Bedrieg my nie, my beminde. So reg in die gees van die sokkerkoors wat vanjaar hoog gaan laai, het hierdie pakkende verhaal 'n aantreklike Argentynse sokkerheld Eduardo de la Covos, as een van die hoofkarakters.
Die interessante gegewe wentel egter om die Suid-Afrikaanse skoonheid Leandra Potgieter, wat oorreed word om tydelik met haar Argentynse vriendin, Tia Melendez, identiteite om te ruil toe Tia se gesig in 'n ongeluk geskend word. Wat vir Leandra die deurslag gee met die neem van dié moeilike besluit, is die feit dat Tia se pa se kans as presidentskandidaat in die komende verkiesing en sodoende ook die toekoms van Argentinië, in die gedrang is.
Wat volg, is 'n snelbewegende verhaal vol aksie, romanse en intrige wat hoog laai. 'n Roman wat nie maklik neergesit word na die lees van die eerste bladsy nie.

Duet

Die ander boek wat ek hier onder jou aandag wil bring, is Moordduet, onder Hartbees Uitgewers se gewilde Duet - spanningsreeks. Daar is twee sterk speur-spanningsverhale in hierdie bundel nl : So lank hierdie nag en Die verwoester.
In So lank hierdie nag word 'n onskuldige man verdink van die moord op sy vrou en haar minnaar. Hy vlug om sy onskuld te bewys, maar die polisienet trek onverbiddelik nouer om hom toe.
Die verwoester handel oor 'n aspirant skrywer wat terugkeer na die dorp van sy jeug. Intussen het alles hier verander. Hy en sy mooi vrou word vasgevang in 'n boosheid wat hulle kan vernietig.
Stols sorg dat die spanning in albei verhale snaarstyf gespan bly.

Albei die boeke is by Hartbees Uitgewers Posbus 329 SWELLENDAM 6740, verkrygbaar. Hulle kan ook ge-E-pos word by: gazette@sagateway.com, Tel: (028) 514-1468 of Faks: 028 514 1989. Elkeen van die boeke verkoop teen: R87.95.

Nou ja, dis my storie. 'n Volgende keer gesels ons oor ander interessante skrywers en boeke.

BOEKEMAN

Uitnodiging

2010-01-06T08:10:00.000-08:00

Welkom op my werf. Wees asb. geduldig want ek is nog nie onderlê in kubertegnologie nie. Maar hier is 'n uitnodiging om enige tyd te kom inloer en te kom luierlees tussen die boeke, stories, vertellinge en geklets oor boeke en oor storiemakers.
Nee, dis nie 'n plek vir die hoghere khuns nie. Hier gaan jy weer met ou vertellers van weleer kennis maak. Die populêre skrywers wat 'n volk aan't lese gehou het. Mans en vrouens wat selde indien ooit die erkenning gekry wat hulle verdien het. Daar was mos 'n tyd dat daar geglo is daar is net letterkunde en snert. Níks tussenin nie.

Alles gelees

Daar was egter ook 'n tyd toe ons mense álles gelees en waardeer het vir wat dit was. C.M. van den Heever en D.F. Malherbe het skouers in huisbiblioteke geskuur met Tryna du Toit en Johan van der Post. En elkeen is na waarde geskat, geniet en waardeer.

Kuierplek

Nou ja, hier is 'n kuierplek waar jy weer soos Yoda op die foto, kan ontspan sodat jou siel jou liggaam kan inhaal soos die Boesman in 'n P.J. Schoemanvertelling gesê het. Kom maak weer opnuut kennis met storiemakers soos: Basil Stols, Frieda de Villiers, Calvyn van Niekerk, Andreas du Plessis, Johann Bekker, Jasper M. Cloete, Marius Gie, Melt Froneman, Jan Combrink, I.D. Lamprecht, Jana Coetzee, Elmar Steyn en nog vele meer.
Van tyd tot tyd sal daar ook stories oor nuwe skrywers en hul werk wees as ook nuus oor erns-
tiger werk. Maar meestal sal jy hier geleentheid kry om weer kennis te neem van herdrukke wat weer pas verskyn het.
Indien hierdie belofte jou prikkel, laat gerus van jou hoor.

Tot volgende keer – BOEKEMAN